استخدم الجيش المصرى فكرة المهندس القبطى باقى زكى ياقوت باستخدام مضخات مايه لتجريف رملة خط برليف.
اقتحم الجيش المصرى خط بارليف.
اتصدت الصواريخ و القوات الجويه المصريه للطيارات الاسرائيليه- حطام طياره ميراج اسرائيليه.
دبابه اسرائيليه من طراز M60 متدمره فى سينا.على الجبهه المصريه قدر الجيش المصرى يعدى قناة السويس و يقتحم خط بارليف و يثبت رجليه على أرض سينا وكانت النتيجة النهائية للحرب هي انتصار للجيش المصرى اللى قعد فى سينا واسرائيل ما قدرتش تطلعه منها رغم كل الهجمات و المناورات اللى عملها جيشها.
ابتدت الحرب لما هجمت مصر و سوريا فجأة على اسرائيل في ضهرية يوم 6 أكتوبر سنة 1973 و كان بيوافق يوم 10 رمضان و يوم الغفران (يوم كيبور بالعبري) اهم عيد عند اليهود. فى اليوم ده خرجت 222 طياره مصريه من مطاراتها و دكت مواقع الجيش الإسرائيلى و مراكز قيادته و اتصالاته فى سينا بدقه كبيره فى حدود 20 دقيقه و رجعت لقواعدها بخساير بسيطه ، و ضربت مئات المدافع المصريه تحصينات خط برليف فى الناحيه الشرقيه من قناة السويس بمعدل قذيفه كل ثانيه و نص ، و عدى 30 ألف عسكرى مصرى قناة السويس فى 2500 مركب مطاطى تحت هدير المدافع بمعدل موجة عبور كل 15 دقيقه. اسرائيل كانت حطت مواسير لكب نابالم فى ماية القنال لتوليعها بالنار فى حالة نزول قوات مصريه فى القناه ، لكن المواسير دى سدت فتحاتها قوات خاصه بالليل قبل ماتقوم الحرب ، و اترفع علم مصر على قمة خط برليف ، و بعد ما قامت قوات خاصه بعمل فتحات فى ساتر خط برليف و اتحطت الكبارى عدت القوات البريه بالدبابات البريه و البرمائيه و المدرعات و المشاه. اتزال من رملة خط برليف 3 مليون متر مكعب. عمل ثغرات فى خط برليف ماكانتش عمليه سهله فالخط ده كان عباره عن تل رملى عالى مدعم بصخر و حديد بيمتد على طول الجبهه. المصريين عملو تجارب كتيره عشان يوصلو لطريقه سريعه تمكنهم من عمل فتحات فيه قدام الكبارى عشان تعدى الدبابات و المصفحات و العربيات و الاسلحه التقيله ، و جربو كذا طريقه كان منها استخدام الديناميت لكن مهندس مصرى قبطى كان مقدم فى الجيش اسمه باقى زكى ياقوت قدر يتوصل لفكرة عبقريه و هى ازالة الرمله و عمل فتحات عن طريق تجريف رملة فى الأماكن المطلوب عمل فتحات فيها بإستخدام مضخات بتسحب المايه من قناة السويس [1]. لمدة 8 ساعات اتصدى عسكر مصر على ضفة القناه الشرقيه للدبابات و المدرعات الاسرائيليه لغاية ما اتحط 60 كوبرى عدت عليها الاسلحه التقيله. فى نفس الغضون نزلت قوات مصريه خاصه و را الخطوط الاسرائيليه و جوه سينا عشان توقف تقدم القوات الاسرائبيه و تأمن المضايق جوه سينا. على الساعه اربعه بعد الضهر ابتدت الطيارات الاسرائيليه تظهر فى سما المعركه لضرب القوات المصريه اللى عدت القناه و تدمير الكبارى و غيرها لكن طوالى وضح للطيارين الاسرائيليين ان مهمتهم مش بالسهوله اللى اتخيلوها و ادركو ان دفاع مصر الجوى اقوى مما كانو عارفين. جدار الصواريخ المضاده للطيارات من طراز " سام " قدر يوقع طيارات كتيره و يحيد السلاح الجوى الإسرائيلى على خط القناه لعمق 15 كيلومتر و يخليه سلاح مالهوش قيمه فى جبهة القتال. فضل عسكر مصر يعدوا القناه و وقع فى ايديهم 22 موقع دفاعى اسرائيلى و 26 نقطه محصنه مساحة كل نقطه 4000 متر و كان فى كل نقطه 26 دشمه للمتريوزات و مرابض للدبابات و المدافع الارضيه و 24 عنبر للعساكر الاسرائليين. كل نقطه من دول كانت متصله بمراكز القياده و بالنقط التانيه. لمدة 4 تيام القياده الاسرائيليه ضاع منها السيطره على عساكرها فى جبهة القنال بسبب قطع الاتصالات و مع مرور الوقت قامت معارك شرسه. الدبابات الاسرائيليه هى كمان واجهت صعوبات كبيره ، فبعد عبور الجيش المصرى للقناه ابتدت الدبابات الاسرائيليه تتدفق فى اتجاه خط النار و هما فاكرين انهم ممكن يزحفو على المصريين و يرجعوهم لضفة القناه الغربيه ، لكن الاسرائيليين لقو مفاجاءه تانيه مستنيه دباباتهم و هى صواريخ " ساجر " اللى عمرهم ماكانو اتعاملو معاها قبل كده. الصواريخ دى بيوصل مداها لمسافة 2 كم و كانت بتتشال على الكتف و كان سهل على عسكرى المشاه انه يجرى و يتحرك بيها ، و فوق كده كان ليها قدره كبيره على اختراق دروع الدبابات و تدميرها أو تعطيلها. قوات المشاه المصريه اللى معاها صواريخ ساجر دمرت دبابات اسرائيليه كتيره ، و زى ما صواريخ سام حيدت الطيران الاسرائيلى صواريخ ساجر حيدت سلاح المدرعات الاسرائيلى و حولت سينا لمقبره للدبابات الاسرائيليه. اسرائيل ابتدت تعمل هجوم مضاد من 8 اكتوبر. بطبيعة الحال المصريين كانو متوقعين الهجوم المضاد و مستنينه و لما اتقدمت الدبابات الاسرائيليه قامت معارك بين قوات المشاه المصريه و الدبابات الاسرائيليه كان للمصريين اليد العليا فيها و على نهاية يوم 8 اكتوبر ادرك الاسرائيليين انهم بيواجهوا حاجه جديده عليهم و ان جيش مصر 1973 ماهواش جيش 1967 و ان الحرب مش فى صالحهم و بتتجه لكارثه. اسرائيل اللى ابتدت المعركه بـ 300 دبابه خسرت نصهم فى ظرف يومين. و حصلت معركة دبابات ضخمه بتعتبر اكبر معركة دبابات فى التاريخ و حصلت معارك جويه كبيره زى معركة المنصوره الجويه اللى انتصر فيها الطيارين المصريين. البحريه المصريه من جهتها قفلت كمان باب المندب فى جنوب البحر الأحمر لمنع وصول امدادات عسكريه لاسرائيل عن طريق البحر الأحمر. عدد القوات المصريه اللى شاركت فى الحرب كان 800 ألف عسكرى و ظابط. اسرائيل و مصر خسرو اعداد كبيره من عساكرهم و قدرت مصر تتصدى للطيارات الاسرائيليه اللى حاولت تسيطر على سما مصر و وقعت منها مابين 200 و 280 طياره. و اتدمرت 500 دبابه اسرائيليه و خرجت 600 من الخدمه. لكن بطبيعة الحال الضرب ماكانش من ناحيه واحده فاسرائيل المتسلحه بأحدث الأسلحه الامريكيه كانت هى كمان بتضرب ضرب جامد و خسرت مصر اعداد كبيره من العساكر و الدبابات و المعدات.
القائد فؤاد عزيز غالى قدر يوم 7 اكتوبر يحرر القنطرة شرق ويدمر 6 نقاط عسكريه اسرائيليه قويه، و فى يوم 8 اكتوبر اتصدى حسن أبو سعده للدبابات و المدرعات الاسرائيليه و دمر 143 دبابه و أسر كتيبه اسرائيليه كامله بما فيها قائدها عساف ياجورى، و فى 9 اكتوبر اتصدى القائد عبد رب النبى لهجوم اسرائيلى و قدر يدمر 113 دبابه [2].
فى حرب اكتوبر ظهرت اسامى عساكر عاديين اشتهرو جنب القواد الكبار من أشهرهم محمد عبدالعاطى اللى اشتهر بلقب " صياد الدبابات " لإنه قدر لوحده يدمر 23 دبابه اسرائيليه و تلت مدرعات وبكده ضرب رقم قياسى فى براعة و دقة التنشين و بقى اسطوره بين العسكر.
حرب أكتوبر 73 حصل فيها 64 معركه (المعركه هى القتال اللى بيشارك فيه لواء عسكرى أو أكتر). انتصرت القوات المصريه نصر مطلق فى 51 معركه واستولت فيها علي مساحة أرض كان الجيش الاسرائيلى بيحتلها يوم 5 اكتوبر بإمتداد 168 كم و بعمق 15 كم بما كان عليها من 31 نقطه عسكريه اسرائليه قويه. فى الجبهه السوريه عدت القوات السوريه خط الجبهه فى هضبة الجولان و اللي كانت اسرئيل احتلتها فى حرب 1967 لكن السوريين عملو غلطه فادحه اتسببت مش بس فى خسارتهم للأراضى اللى سيطروا عليها لكن كمان اتسببوا فى كارثه على الجبهه المصريه. فاسرائيل اللى لقت ان صعب عليها مواجهة جبهتين فى وقت واحد قررت انها تخلص بسرعه من الجبهه الأضعف و هى الجبهه السوريه عشان تقدر تركز على الجبهه المصريه. الجبهه السوريه كانت اخطر على اسرائيل من الجبهه المصريه بسبب قربها من اسرائيل نفسها على عكس الجبهه المصريه اللى مابينها و بين اسرائيل نفسها صحرة سينا. على الأساس ده قررت اسرائيل الاتجاه لسوريا الأول معتمده على غلطه سوريه كبيره و هى ان القوات السوريه وقفت محلك سر فى مكانها فى مرتفعات الجولان و مااتقدمتش فى اتجاه نهر الاردن و لو عملت كده كانت اسرائيل واجهت ضغط كارثى. الاستراتيجيه السوريه ادت اسرائيل فرصه انها تتقدم و تستخدم طيرانها المتفوق و تقتحم الجولان و تدمر الدبابات السوريه المتمركزه فى الجولان و بقت سوريا نفسها مفتوحه قدام القوات الاسرائيليه و لما ده حصل اتصاب السوريين بالذعر و طلب الرئيس السورى من الرئيس انور السادات عمل حاجه بسرعه و الضغط على اسرائيل اكتر فى سينا للتخفيف على الجبهه السوريه فعمل السادات غلطه فادحه و هو انه ادى امر بتقدم القوات المصريه جوه سينا و اعترض رئيس الأركان اللوا سعد الدين الشاذلى حيث ان تقدم الجيش المصرى فى سينا كان معناه ببساطه خروجه من نطاق الدفاع الجوى المصرى و وقوعه فى مصيده الطيران الاسرائيلى و ده اللى حصل و اتسببت العمليه فى خساره كبيره لمصر بتعتبر نقطة تحول رئيسيه فى حرب اكتوبر. قدر الطيران الاسرائيلى و الدبابات الاسرائيليه المتمركزه فى خط دفاعى كويس انهم يدمروا اعداد كبيره من الدبابات المصريه المتقدمه و خسرت مصر حوالى 260 دبابه. من ناحيه تانيه، تقدم القوات المصريه اتسبب فى تكوين منطقه مش مأمنه دفاعياً مابين الجيش المصرى التانى المتمركز فى المنطقه من الاسماعيليه فى الجنوب لغاية بورسعيد فى الشمال، و الجيش التالت من الاسماعيليه فى الشمال لغاية السويس فى الجنوب و دى حاجه استغلتها اسرائيل فى عمل العمليه الى اتعرفت باسم " الثغره ".
ليست هناك تعليقات:
إرسال تعليق