ازاى تربي سماااان صح
نسمى الله و نبدا بتجهيز المكان
محتاج
- مساحه 1 متر مربع / 50 سمانه
- سقاية سعه 2 لتر / 50 سمانه
- طبق تحضين / 100 سمانه
- دفاية غاز
كدا مكانك جاهز بعد كدا محتاج كتكوت نضيف
نسمى الله بقا و ندخل ع الرعاية ..
هتستقبل كتاكيتك ازاى ؟
- الفرشه تكون جير و فوقها نشاره او تبن ( النشاره افضل لانها بتمتص الرطوبه اكتر من التبن )
- هتدفي المكان قبلها بساعتين ع درجه حراره 35 تقريبا و نقلل الحراره بمقدار 4 درجات كل 5 ايام .
- هتقفل مداخل الهوا عشان تتحكم ف درجه الحراره و تمنع اى تيار هوا
- هتحط العلف و المايه جاهزين ف المكان عشان ياخدو درجه حراره العنبر
هنحط ايه ف الماية ؟
اول يوم
- معلقة عسل اسود او عسل نحل / لتر ماية ( عسل النحل افضل لانه يعمل ك رافع مناعه ممتاز جدا )
- هتحط اى دوا يحتوى على ماده الفلورفنيكول ( زى الفلوريكول او البان فلور ) بمعدل سم / لتر
- يفضل تحط محلول جفاف بمعدل باكو للتر ( من اى صيدليه بشرى )
ده سقوه واحده لمده 8 ساعات اول ما تنزل الكتاكيت بعد كدا ماية بيضا عادى
اليوم التانى و التالت
هتكمل جرعه الفلوريكول سقوه 8 ساعات كل يوم برضو
اليوم الرابع و الخامس و السادس
هتحط فلومكس بشرى كبسوله / 4 لتر سقوه 8 ساعات و تريح ال4 ساعات و بعدين تحط 8 ساعات املاح معدنيه
لو ده صعب عليك و معندكش وقت او بتستسهل عادى نزل الفلومكس سقوه و الاملاح سقوه و خلاص
كدا نقدر نقول عدينا مرحله الخطر
شويه ملحوظات ع السريع كدا ..
بلاش تستقبل ع مايه بسكر عشان بتزود الانتفاخات و الخمرات ف امعاء الكتكوت الصغير و بالتالى تزود البكتريا و بالتالى النافق ممكن يعلى معاك ..
بلاش تخلى اى حاجه ناعمه الطائر ممكن يتزحلق عليها لان ده هيسبب ارتفاع نسبه الكساح ف السن الصغير
اى مكان مبلول ف الفرشه لازم تزود عليه طبقه او براحه جدا كدا تشيله و تحط بداله عشان ميحويش امراض ..
اي سؤال او مشاكل تواجهكم هنكون على تواصل علي رسائل الصفحه
شير خلي الاستفاده توصل غيرك
م. رضا
